الإثنين , 12 أبريل 2021
الرئيسية / مجتمع / استغاثة كاتب وإعلامي تونسي.. زوجته تحمل جنينا ميتا لأكثر من شهر بسبب تأجيل “عملية مستعجلة” بدون ذكر الأسباب

استغاثة كاتب وإعلامي تونسي.. زوجته تحمل جنينا ميتا لأكثر من شهر بسبب تأجيل “عملية مستعجلة” بدون ذكر الأسباب

عبّر الكاتب و الإعلامي التونسي عيسى الجابلي عن غضبه و سخطه مما يعانيه منذ ما يزيد عن أسبوع بسبب اهمال الأطر الطبية و الشبه طبية إزاء حالة زوجته التي تحمل في أحشاءها جنينا ميتا منذ أكثر من شهر. وقد تقرر إجراء عملية استعجالية لها إلا أنّها تتأجّل يوميا بدون ذكر سبب أو توضيح في وقت تتدهور فيه صحة الأم بشكل متسارع.

و كتب الجبلي على صفحته بالفيسبوك تدوينة أتى فيها على كافة تفاصيل رحلة المعاناة مع المؤسسات الاستشفائية بكل من سوسة و تونس. و هذا نص التدوينة:

“عايش تونسي و.. normal”
يلزمني نحكي
نهار الجمعة لي فاتت مشيت نا وحنان للطبيبة في موعد. عملت إيكو قالتلنا الحمل توقّف (بلغة الطبّة) يعني بلغتنا (الجنين مات) وعمرها (70 في المائة بنية حسب ما قالت في موعد سابق) 14 أسبوع والسبب حسب ما قالت هي هو التعب المفرط: حنان وصلت تقرّي في رمضان م الثمنية حتى للثلاثة متع العشية تروح للدار تكمل مسلسل الوقفة بتطييب الفطور وبعد الفطور يلزمها تكمل مسلسل الوقفة متع غسيل الماعون وترقد بكري بش تصبح تقرّي بش تبقى ديما “تجبد في الفلوس م الحيط” كيما يقولو الجماعة. الجنين مات.. والحل؟ يلزم عملية قيصرية بش يتنحى ولكن يلزمها تصير في مستشفى جامعي خاطر “الخلاص داخل في الجرح متع القيصرية السابقة لي تولد بيها ضياء” (بلغة الطبة) وبلغتنا معنتها المشّيمة داخلة في السيكاتريس في الرحم. وبما أنو بوزيد فيها 7 مستشفيات جامعية قالت امشو لصفاقس ولاّ سوسة. قلنالها نمشو لسوسة سبيطارها يحكو عليه “كلينيك” على حالو. وقالتلنا المسألة فيها خطورة يلزمكم تمشو في أقرب فرصة. حنان تبكي وقلبي يبكي على تعبها وأعصابها وماكلتها لي امرارت ولكن لقيت روحي مضطر نتماسك وما نبكيش “ماني راجل” ونصبر فيها بخزعبلات علموني منها بزايد.
نهار السبت كنّا في سبيطار فرحات حشاد. فحوصات وتحاليل دم وإيكو وهز وانفض قالولها تروح اليوم وترجع نهار الإثنين بش نرقدوك. ما نعرف حد في السبيطار والعالم يدور بيّ وحنان توصّي فيّ على الصغار وتطلب في السماح وتبكي على ضياء لي كان السبب في الحمل الثالث هذا. في الصيف لي فات ولاّ لي قبلو كنا في الشط في مستير. قال ضياء: “نا نعرف أنو ربي تيحققلي الأمنيّة متاعي” (الأمنيّة بتضعيف الياء بقوة كما ينطقها) سألاتو حنان شنية “الأمنيّة” قالها: “أنو تكون عندي أخت”. سألاتو: “كيفاش تحبها تكون واش تتسميها؟” قالها “عينيها زرق ونسميها لينا”. من وقتها بدت رحلة البحث عن لينا إلى أن ولت “مضغة” وبعد ولّت قلب يدق شفناه وسمعناه وبعد ولت جثة “عايشة” في أحشاء حنان منذ أكثر من شهر، وما عطت حتى علامة على أنها ميتة.
السبت والأحد جحيم. بكاء وألم وندم ومحاسبة للذات وبحث عن الأسباب والعلل ووووو
نهار الإثنين مسلسل جديد متع تحاليل وإيكو وامشي جدد الكرني ولوّج على الإدارة السريعة وضيع في الطريق وبعد كي توصللها تستناها تحل وتقص رقم وتستنى دورك وكي توصل للشباك يقلك الكرني متاعك مسال في أكثر من 70 دينار.. والحل؟ تمشي للكنام في باب بحر ومسلسل جديد من البحث عن الكنام تطلع للطابق الخامس تلقى واحد فادد من روحو مازال كي جا للبيرو تخلصو ويعطيك الكرني تهزو وتطير بيه تلقى روحك في طريق المستير وتبدا تلوج من جديد: بربي سبيطار…” تنسى اسمو وتطلب م السيد يسميلك سبيطارت سوسة تقلو هذاكا هو.. فرحات حشاد يقلك خليتو لتالي اوصل للكيوسك واسأل.. ما نطولش عليكم. نوصل للسبيطار نخلص ونمشو نلوجو على سرير نبقو قرابة ساعة ونص نستنو في سرير يفرغ بش ترقد فيه حنان.. وبعد أكثر من ساعة أو ساعة ونص يجينا الفرج. فرملية قالتلنا هي مرا بش تخرج تو بش تشد أنت بلاصتها. المرا خارجة يطيحلها السكر تدوخ يرجعوها للسرير ونبقو في الكلوار. وبعد رحلة انتظار فرغ الفرش المحنون. المطلوب توا يلزمك 4 شكاير دم ويلزم تحضر الفاصمة لي بش يعملوها للجرح متع العملية ويلزمك تشري هك الدواء لي ينقص م الألم (ظاهرلي اسمو مورفين). يلزمك تشريهم على حسابك. وبرى لوج على فارماسي..
العملية نهار الخميس ويلزم كل شيء يكون حاضر مكانش شي ما يصير.
الإثنين انتظار مُرّ والعملية حالة استعجالية لأنو فيها ريسك متع نزيف قاتل
الثلاث انتظار مًرّ والعملية حالة استعجالية لأنو فيها ريسك متع نزيف قاتل
الأربعا انتظار مرّ والعملية حالة استعجالية لأنو فيها ريسك متع نزيف قاتل
الخميس يجوها فرامل يعطوها هاك الروبة الزرقا الداكنة المسخة متع واحد يخدم في كيوسك عجيل ولونها كي لون الحبس بالضبط وقالولها البسيها وابقي صايمة هانا جايين.. الساعة الاولى لا والثانية لا وفي وسط الساعة الثالثة جتها فرملية قالتها راهي ظاهرلي العملية annulée وما تعطيكش علاش ولا كيفاش ولا عمار بو الزور وتسأل ينجمو يبخسوك وينجمو يشرولك عركة خاطر في سبيطار فرحات حشاد الفرملية أقوى من وزير الداخلية خلّي يا وزير الصحة. وزيد لا تفهم أناهو الطبيب م الفرملي م البروفيسور م الأقريجي لا زمارة: كلهم يلبسو هك البلوزة الخضراء وسروالها ومعاها شلاكة بلاستيك هك المنقبة وكلهم عاملين سماعات متع دقات القلب.. وكي يدخلو فيهم واحد ولا اثنين يردو السلام.. حتى المنظفات تنجم وحدة مثلا تكركرك من شعرك وnormal..
وبعد انتظار طويل تبينا أنو العملية ما صارش منها رغم أنها مبرمجة أول عملية لليوم الخميس. شكون خذا القرار؟ وقتاش؟ كيفاش؟ وعلاش؟ لي تسألو يقلك: “ما نعرفش”. تسأل على السيرفايونت متع قسم الولادات يقولولك “خرجت” سألت عساس على رئيس القسم ضحك عليّ وقالي عندي عامين نخدم هنا ما ريتوش. موش خاطر ما يجيش أما خاطر ما يظهرش.. وnormal
حكيتلكم الحكاية هذي لي فيها برشا ضحك ممكن وفيها برشا ألم خاطر نحس أنو في راسي حربة قايمة: لو يصير النزيف الليلة وحنان راقدة وتفيق بيه في آخر لحظة.. شنوة بش يصير؟ شكون يتحمل مسؤولية؟ “نفتحو تحقيق في الغرض”؟ طيب. كي نعمل عركة ونزرق عريان في السبيطار زعما ما نولّيش “بوزيدي قعر” و”عربي متخلّف” و”همجي من ورا البلايك”؟؟؟ وكي نسكت وتصير كارثة شكون مازال بش يلومني على لي بش نعملو بعدين؟؟ وشنوة لي ينجم يصلح أي تبعات أي استخفاف أو تهاون في السبيطار؟؟؟ يلزمني نكلم وزير الصحة بش العملية تصير؟؟ كيفاش جنين ميت في كرش أمو منذ أكثر من شهر والجماعة ولا على بالهم؟ يخي يلزمني نعطي رشوة؟ ولاّ نمشي نولّدها تحت حيط وحدي؟؟؟ يلزمني نكون ولد أخت وزير الصحة بش يشوفلي طاقم طبي يحللي المشكلة؟؟؟ ولاّ يلزمني نمشّي حويجة للأمين العام للأمم المتحدة بش العملية تصير وانحي ها الكابوس من راسي؟؟ كيفاش حالة استعجالية جدا تجي لقسم الاستعجالي وتعدّي أسبوع كامل في انتظار العملية والعد متواصل؟؟؟
حياتي متوقفة: التزامات مهنية ملغاة أو مؤجلة. مقالات في انتظار الكتابة. لا أعرف أحدا في هذا المكان وذقت طعم اليتم الحقيقي في هذا المكان. ولكنني رغم هذا: أقسم بالله أيها الأوغاد جميعا، أقسم بالله لأشعلنّ فيكم النار إذا حصل أي مكروه بسبب تهاونكم. أقسم بالله لأثأرنّ لدموع نبراس وضياء بأكثر الطرق الهمجية همجيّة ولتذهب الأخلاق والتربية والقيم والمبادئ معكم إلى الجحيم.
عيسى جابلي. 21.06.2019 الواحدة صباحا.

عن العربي الحر

شاهد أيضاً

خمس بطاقات إيداع بالسجن في قضية قتل رجل وسحله بقفصة

أصدر قاضي التحقيق بالمحكمة الإبتدائية بقفصة، أمس الجمعة 16 أوت، خمس بطاقات إيداع بالسجن في …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: